நன்றியதலின் நெகிழ்வில்...

வருடாவருடம்
வந்து போகும் என் நாள்
வழக்கத்திற்கு மாறாய்
பிரம்மிப்பின் வாசலில்
இழுத்து நிறுத்தியிருக்கிறது
என்னை!

நேற்றைய நள்ளிரவில்..

இதுவரை நானறிந்திராத
திசைகளினின்று நீண்டு...

கதகதப்பாய்
என் விரல் கோர்த்த கரங்கள்...

கைகுலுக்கிய தோழமைகள்...

இதம் நிறைத்த
தலைகோதல்கள் எல்லாம்..

என் இருப்பை முழுதாய்
அர்த்தப்படுத்திப் போயிருக்கின்றன!

துக்கத்தில் தூக்கம் தொலைத்த
இரவுகள் உண்டு...
மிதமிஞ்சிய மகிழ்வும்
உறங்க விடாதென்ற உண்மை
விளங்குகிறது இப்போது..

வாழ்த்துச் சுமந்து வந்த
வார்த்தைகள் எல்லாம்
பூக்களாய் மலர்ந்து
மணம் பரப்புகின்றன மனதிற்குள்...

திக்கெங்கிலும்
நிரம்பி வழியும் அன்பினை
சேர்த்தெடுக்கத் தவிக்கிறேன்...

இதயம் மலர்ந்து...
கண்கள் பனிக்க...

'என்றும் என்னோடிருங்களெ'ன
வேண்டுவதைத் தவிர்த்து
வேறொன்றும்
சொல்லத் தோன்றவில்லை
இப்போது!

வியப்பாயிருக்கிறது! 2 மாதங்கள் முன்பு வரை நானும் தனிமையும் மட்டுமாய் நிரப்பியிருந்த என் நாட்கள் இப்போது எல்லைகள் கடந்த தொடர்புகளோடு கண்முன் விஸ்வரூபமாய் விரிகின்றன. இத்தனை வருடங்களில் எந்தப் பிறந்தநாளும் இப்படி வாழ்த்துக்களால் நிரம்பி வழிந்ததாய் நினைவிலில்லை!
இவ்வளவு அன்பும் எனக்கே எனக்கா என்ற திகைப்பு மேலிட பூரிப்பில் திளைத்திருக்கிறேன்.

இரவு 8 மணியிலிருந்து ஒரு மணி நேரத்திற்கு ஒரு முறை போனில் வாழ்த்திக்கொண்டேயிருந்த அபி அப்பா மிகச்சரியாய் இரவு 12 மணிக்கு... வழக்கம் போல தூங்கிப்போனார்!!

கிண்டலும் கேலியுமாய் 'கவுஜ' எழுதி சங்கம் மூலம் வாழ்த்திய பாசமிகு அண்ணன் இளா மிகச்சரியாய் நிமிடங்களை.. நொடிகளைக் கணக்கிட்டு துல்லியமாய் நாளின் துவக்கத்தில் வாழ்த்தி திகைக்க வைத்தார்.

தனக்கே உரிய பாணியில்... நையாண்டியின் நடுவில் நட்பை ஒளித்து வைத்து அழகிய பதிவை பரிசளித்ததும்இல்லாமல்... போனிலும் வாழ்த்தினார் நண்பர் குசும்பன்!

இதுவரை சாட்டில் கூட பேசியிராத அன்புத்தங்கை மைஃப்ரண்ட் போனிலும் சாட்டிலுமாய் திரும்பத் திரும்ப வாழ்த்திக் கொண்டேயிருந்தாள்.

உடன்பிறப்பென பதிவில் வாழ்த்தி என்னையும் பிசாசு ஆக்கியிருக்கிறது குட்டிப்பிசாசு!

நடுநிசியில் குறுந்தகவல் அனுப்பி விடியும் வரை யாராயிருக்குமென யோசிக்க வைத்து அதிகாலையில் உற்சாகம் மிகுத்து பாசமாய் வாழ்த்தினாள் ஜி3.

இளந்தல ராயல் ராமின் வாழ்த்து வித்தியாசமாய் (!?) மறக்க முடியாததாயிருந்தது.

சொந்த ஊருக்கு போயிருக்கும் ஜி நியாபகமாய் வாழ்த்தியது வியப்பு!

இன்னும் அய்யனார், தம்பி, கோபி, கண்மணி அக்கா, துர்கா செல்லம், மின்னல் ..... மற்றும் வாழ்த்துச் சொன்ன சொந்தங்கள் அனைத்திற்கும் இங்கு என் அன்பைச் சொல்லிக் கொள்கிறேன். நன்றியிலும் நெகிழ்விலும் நிறைந்திருக்கிறேன்.. இன்று மீண்டும் புதிதாய்ப் பிறந்திருக்கிறேன்!!



நிறைவாய் மீண்டும்...

நன்றி! நன்றி! நன்றி!