சொல்ல மறந்த கவிதை!

உணர்வுகளையும்
நிகழ்வுகளையும்
சொற்களாய்ச் சேமிக்கும் முயற்சியில்
முதல் முறையாய்
தோற்றுப் போயிருக்கிறேன் இப்போது...

மஞ்சள் நிறத்துப் பூக்களும்
பெயர் தெரியா மரங்களுமாய்
எவருமற்றிருந்த அப்பூங்காவின் நடுவே
இதுவரை எழுதப்படாதவோர் கவிதைபோல
நீ உன் காதலைச் சொன்னாய்.....

காலமும்
பூமியும்
நானாடிய ஊஞ்சலும்
அசைவற்று நின்று போன
அந்த கணங்களின் பின்னால்...

இன்னமும் மிச்சமிருக்கின்றன
எவராலும் எழுதிவிட முடியாத
ஒரு கோடிக் கவிதைகள்!